fbpx

3 конкретни причини зошто јадењето непосредно ПРЕД спиење не е добра идеја

tonus

Сите понекогаш имаме нездрави оброци доцна во ноќта иако сме свесни дека тоа можеби и не е најдобриот избор. Но, што всушност се случува кога јадеме непосредно пред спиење и дали тоа е толку лошо колку што слушаме дека е?

Во продолжение, 3 главни причини зошто треба да го избегнуваме јадењето доцна во ноќта, особено обемното јадење на нездрава храна.

Доцните оброци и варењето


Заземањето на хоризонтална положба или лежењето непосредно по оброците доцна во ноќта, особено ако се тие обемни, можеби на почетокот создава чувство на пријатност и задоволство. Сепак, дигестијата најдобро се одвива во вертикална положба. Кога желудникот е полн со храна и немаме ,,помош’’ од гравитацијата која ќе ја повлекува храната низ цревниот тракт, желудочните киселини (неопходни за дигестирањето) можат да се придвижат кон хранопроводот, предизвикувајќи рефлукс или киселини (чувство на непријатност и горење во градите).

"“Online”/

Ваквото чувство освен што е сосема непријатно и болно, го нарушува и правилниот сон.

Сепак, треба да се знае дека не секоја храна делува на ист начин. На пример, парче пица дополнето со газиран засладен пијалак е најлошиот избор кој можете да го направите пред спиењето. Јадењето умерени количини киви или цреши пред спиењето пак, може да биде позитивно во однос на сонот, поради некои нивни компоненти.

Полн стомак – немирна ноќ

Освен тешкотиите кои може да се појават од киселините или тешкото варење на храната, обемните оброци (особено оние комбинирани со газирани сокови) доцна во ноќта можат да ве остават и без сон.

Според  National Sleep Foundation забрзаниот метаболизам во текот на ноќта, предизвикан од обемните оброци непосредно пред спиењето, го прави мозокот поактивен, па тоа може да води и кон кошмари. Ако често ве измачуваат лоши соништа, избегнувајте да јадете најмалку час до два пред да си легнете. Пообемните оброците избегнувајте ги и повеќе часови пред спиењето. Според досегашните истражувања, како најпроблематична храна за достигнување на длабокиот сон се смета масната храна.

Сите знаеме дека кофеинските пијалаци ,,не држат” будни подолго време, но можеби помалку познато е дека и стомакот полн со алкохолни пијалаци е непријател на сонот. Можеби тоа ќе ве направи поспани, но алкохолот го спречува ,,длабокиот сон” и на тој начин ве спречува соодветно да се одморите – дали поради будење во сред ноќ или порано будење наутро со чувство на замор и поспаност. Дополнително, по прекумерното консумирање на алкохол, често се јавува неодложна потреба од будење заради одење во тоалет или пиење вода, а почести се и лошите соништа.

Доцните оброци и зголемената телесна тежина

Можеби најопасната последица од навиката за јадење доцна во ноќта е зголемениот ризик од гојазност. Тешко е да се каже дека има директна релација помеѓу гојазноста и доцните обилни оброци, бидејќи гојазоста е хронична состојба за чие појавување се важни комбинација од многу фактори и надвор од начинот на исхрана. Сепак, јасно е дека јадењето доцна во ноќта, особено таквата навика, го зголемува ризикот од гојазност и тоа е случај од неколку причини.

Прво, најчесто доцна во ноќта се одбира брзата и храна со висок вкусов интензитет – скоро по правило нездрава калорична храна, односно ,,празни калории”. Ретко кој јаде здрава храна во овој период. Второ, она што го сметаме за јадење под стрес, најчесто се одвива доцна во ноќта и исто така подразбира консумирање на нездрава храна.

,,Редовното јадење доручек и избегнувањето на јадење доцна во ноќта, е најдобро за согорување на масните наслаги и губење телесна тежина.” Ова се вели во една нова студија на Вандербилт Универзитетот од Нешвил.

Споменатата студија од Универзитетот Вандербилт, вели дека за покачување на телесната тежина не е важен само бројот на внесени калории, туку и времето кога тие се консумираат.


Следењето на биолошкиот часовник е важно

 

Резултатите од студијата се поврзуваат со биолошкиот часовник. Тоа е всушност внатрешниот часовник на телото според кој се координираат стотици процеси, од јадењето и спиењето, па се до одржување на температурата и нивоата на различните хормони.

Истражувачите го поврзуваат нарушениот циркадијален ритам со зголемен ризик од многу заболувања. Нарушен циркадијален ритам најчесто имаат работниците кои често работат во различни смени или одат трета смена. Овие нарушувања, пред сè, го зголемуваат ризикот од кардиоваскуларни заболувања и гојазност. Повеќе на темата прочитајте тука.

Дополнително, нарушениот сон на подолг рок (кој може да биде причинет и од прејадувањата во ноќта, како што споменавме), може да води и кон гојазност. Повеќе околу ова, прочитајте тука.

Краток заклучок

Проблемот со јадењето доцна во ноќта настанува кога тоа преминува во навика.

За да не премине во навика, треба да сфатиме дека за процесот на слабеење е многу важно никогаш да не бидете гладни. Затоа, не треба да се прескокнуваат оброци што потоа може да нé води кон чувство на глад во ноќта. Имајте солидна и хранлива вечера, барем 3 часа пред спиењето. Ако имате потреба од мала ужина подоца во ноќта, одберете некоја свежа или полнозрнаста храна која ќе ви го стабилизира шеќерот, што е исто така важно за добар сон.

Сепак, најчест проблем или причина, особено ако имаме навика на ноќно прејадување е стресот. Покрај тоа што треба да најдете начин да менаџирате со него на ,,долги патеки”, можете да ги искористите следните 3 совети за сузбивање на потребата за јадење доцна во ноќта, иако знаете дека објективно не сте гладни:

Имајте план – солиден план за исхрана кој е погоден за вас, бидејќи како што рековме, гладувањето во текот на денот ве прави гладни навечер.

Усвојте добри навики за спиење – на тој начин ќе избегнете да сте будни многу доцна (физичката активност може да биде од значителна помош за полесно заспивање), а и самиот правилен сон влијае на телесната тежина.

Пијте повеќе вода – при т.н. емотивно јадење (ноќното прејадување е најчесто такво), најчесто не сме воопшто гладни. Според истражувањата чувството на жед во дури 60% од случаите е помешано со она за глад. Напијте се чаша вода или две и почекајте 10-тина минути да видете дали сé уште ќе имате неодложна потреба за вкусна храна. Ако тоа не помогне, а сте свесни дека не сте навистина гладни, најдете си некаков друг начин на дистракција од храната – серија, книга, музика итн.

Д-р Митов

Д-р Митов

Ние ви помагаме ВИШОКОТ КИЛОГРАМИ и поврзаните БОЛЕСТИ, на ПРИРОДЕН начин и трајно да ги отфрлите, за да бидете: ПОЗДРАВИ, ПОЛЕСНИ и ПОЛЕТНИ!

Leave a Replay

Може ќе ве интересира

Програми

X
Добијте бесплатен пристап до нашиот неделен информатор