Првата половина од месецот август помина, а тоа значи дека веќе е започната сезоната на бамјата. Ботанички гледно, бамјата претставува овошка, но во рецептите најчесто се приготвува како зеленчук. Уникатната конзистенција и вкус овозможуваат широка примена на оваа билка низ кујните ширум светот. Како еден пример, во традиционалната македонска кујна, бамјата е најпозната по нејзиното користење во специјалитетот турлитава.
Таа претставува едногодишно, цветно растение на кое му е неопходно топло време за успешен раст, па затоа најчесто се одгледува во топлите краишта, но и во нашата држава.
Искористете го периодот кога таа е најприсутна на нашите пазари, бидејќи навистина бамјата е исклучително здрава.
Нутритивен профил
Бамјата е одличен извор на нутриенти и спаѓа во т.н густо-нутритивна храна – содржи многу нутриенти, а сепак е ниско калорична.
Во 100g бамја се содржат:
- 33 калории
- 7,5g јахлехидрати (од кои дури 3,2g растителни влакна)
- 2g протеини
- минимално количество масти – 0,2g
Покрај тоа, во бамјата се содржат низа на витамини и минерали, првенствено: витаминот К, витаминот Ц, Б6, А, Б9, како и магнезиумот.
Значи, бамјата е пред сé добар извор на витамините Ц и К, но и на магнезиум и витамин А. Тоа би значело дека тие се добри за имуниот систем и здравјето на коските(витамин К и Ц), дека се погодна храна за дијабетичари и слабеење(густо-нутритивна храна, богата со растителни влакна), за бремени жени(витамин Б9) и храна добра за одржување на здравиот вид(витамин А).
Во продолжение издвојуваме два одлични, вкусни и лесни зеленчукови рецепти со бамја.
Бамја подготвена на медитерански начин
За подготовка на овој рецепт ќе ви бидат потребни околу 35 минути и истиот е доволен за околу 4 порции.
Потребни состојки:
- Малку маслиново масло
- 1 главица исецкан кромид
- 3-4 чешниња лук, ситно исецкани
- 1 лута зелена пиперка, ситно исецкана
- Околу 400-500g бамја
- Малку сол, бибер, коријандер и мелен црвен пипер
- 2 домати, испасирани
- 1 домат, исецкан на кругови
- 150ml вода
- Сок од половина лимон
Начин на подготовка:
- На поголемо, подлабоко тавче (по можност да имате и капак за истото) ставете да се загрее малку маслиново масло, а потоа додадете ги кромидот, лукот и лутата пиперка. Динстајте околу 4-5 минути, а потоа додадете ја бамјата и продолжете со динстање уште дополнителни 5-7 минути.
- Зачинете по желба. Потоа додадете ги пасираните домати и водата. Промешајте. Наредете ги круговите од домати на врвот, поклопете со капакот (не целосно) и оставете да се динста на пониска температура околу 20-25 минути. На крајот додадете го сокот од лимон.
- Послужете врз кафеав ориз или со топли, интегрални парчиња леб.
Вкусна бамја со пилешко месо
За подготовка на овој рецепт ќе ви бидат потребни околу 40 минути и истиот е доволен за 4-5 порции.
Потребни состојки:
- Околу 400-500g пилешки гради
- Малку маслиново масло
- 1 главица кромид, ситно исецкана
- 2-3 чешниња лук
- 1 зелена лута пиперка (доколку не сте фан на лутото, може и блага)
- Малку сол, црн бибер, мелен црвен пипер и оригано или магдонос
- 2 големи домати, исецкани
- 1 конзерва пченка
- Околу 500g бамја, исецкана
- 400ml пилешки бујон или вода
Начин на подготовка:
- Пилешкото месо исецкајте го на ситни коцкички. Во тавче со загреано маслиново масло, додадете го пилешкото месо и динстајте го околу 5-6 минути. Оставете го на страна, додека го подготвувате зеленчукот.
- Во тавче, ставете ги кормидот, лукот, лутата пиперка и зачините. Додадете малку масло и динстајте го зеленчукот неколку минути. Кога истиот малку ќе омекне, додадете ги доматите, пченката и пилешките парченца и гответе дополнителни 5-7 минути.
- Потоа додадете ја и бамјата, а потоа и пилешкиот бујон или водата. Гответе дополнителни 5-10 минути или додека не ја добиете посакуваната текстура.
- Послужете со зготвен ориз и декорирајте со малку магдонос.