Поинаква употреба на боранијата – подгответе здрава и вкусна салата!
За подготовка на малку поинакви и вкусни рецепти, понекогаш е потребно експериментирање и испробување на нови комбинации. Секако, основите да останат исти: свежи и здрави намирници со што поголема разновидност. Па во тој поглед, денес издвојуваме два интересни рецепти за малку поинаква употреба на боранијата, односно за подготовка на вкусна, свежа и нутритивна салата од боранија.
Боранијата – исклучително здрава и корисна мешунка
Постојат над 130 видови боранија, во различни бои (зелена, бледожолта, виолетова, црвенкаста и со шарени траги) и облици. Најчесто се култивира на далечниот исток, но се одгледува и кај нас во Македонија. Најзастапени се видовите лоди, нерина, италијанска и кинеска боранија. Може често да се сретне во домашната кујна во различни рецепти, а низ маркетите може да се најде и во конзерва, но и во замрзната форма.
Боранијата е една од најстарите одгледувани култури. Воедно, оваа мешунка се вбројува во најгусто-нутритивните храни што постојат, односно содржи нешто под 30 калории во 100g, а од друга страна е навистина богат извор на низа микронутриенти, како железо, калиум, магнезиум, калциум, витамин А, К, Ц итн. Таа има слична хранлива вредност како бамјата и грашокот.
Салата од боранија, наут и грав
За подготовка на овој рецепт потребни ви се околу 15-20 минути, а истиот е доволен за околу 4 лица.
Потребни намирници:
За преливот:
- Маслиново масло
- Балсамико оцет
- Сол и малку мелен црн бибер
- По желба, половина лажичка мед
- Малку сушена црвена пиперка
- Околу 50g ситно исецкан кромид
- 1 чешне лук, ситно исецкано
За салатата:
- Околу 200g боранија
- 1 конзерва подготвен наут
- 1 конзерва подготвен грав (околу 400g) или претходно сварен домашен грав
- Малку свеж магдонос
- Малку фета сирење
- Неколку маслинки
- 1 свеж домат, исецкан на коцкички
Подготовка:
- Боранијата ставете ја во зовриена вода и гответе ја 6-7 минути. Потоа, брзо истурете ја зовриената вода и ставете ја боранијата во ладна вода. Оваа постапка ќе го запре дополнителното термичко процесирање на боранијата и ќе помогне таа да ја зачува својата боја и текстура. Парчињата оладена боранија преполовете ги за полесно јадење.
- Подгответе го преливот така што ќе ги измешате сите потребни состојки во мал сад.
- Во голем сад за салата, ставете ја боранијата, наутот, гравот, фета сирењето, магдоносот и маслинките. Прелијте ги со преливот и фино промешајте. Додајте ги и доматите, посолете, додадете малку бибер и повторно промешајте.
- Послужете со парче интегрален леб.
Медитеранска салата од боранија
За подготовка на овој рецепт потребни ви се околу 10 минути, а истиот е доволен за 3-4 лица.
Потребни состојки:
- Половина килограм боранија
- 1 свеж домат, исецкан
- Една помала главица кромид, ситно исецкана
- Неколку маслинки
- Малку урда
- 5 суви смокви (по желба), ситно исецкани
- Малку ореви
- Една пиперка, исецкана на кругчиња
- Малку балсамико оцет
- Маслиново масло
- 2 чешниња лук, ситно исецкани
- Сол и мелен црн бибер
Подготовка:
- Во зовриена вода додајте ја боранијата и оставете ја да се вари 7-8 минути. Процедете ја и ставете ја во сад со ладна вода.
- Боранијата прекшршете ја на половина и ставете ја во сад за салата. Додадете ги и останатите состојки и фино промешајте.
- Послужете.
