Честопати го споменуваме т.н гликемиски индекс на храната, а во продолжение на оваа денешна статија ќе погледнеме како овој параметар влијае на инсулинот и неговите вредности.
Што претставува вредноста на гликемискиот индекс?
Гликемискиот индекс е бројна вредност, која означува колку брзо телото ги конвертира или преобразува јаглехидратите од храната во глукоза, односно шеќер во крвта. Два типа храна со потполно иста јаглехидратна содржина, можат да имаат различни вредности за гликемискиот индекс.
Колку што е помала вредноста на гликемискиот индекс, толку консумираната храна има помал импакт врз нивоата на шеќер во крвта.
- 55 или помалку – низок или добар гликемиски индекс
- 56-69 – среден
- 70 или повеќе – висок гликемиски индекс
Кај некои од продуктите вредноста на гликемискиот индекс е дадена на пакувањето, а доколку не можете да ја најдете, можете во врска со тоа да се консултирате со докторот кој ве следи или самите да го проверите ГИ на интернет.
Генерално важи следното правило: Храната која што е поблиску до нејзината природна форма, односно е што помалку процесирана, има тенденција да има помал гликемиски индекс.
Редовното консумирање на храна со повисок гликемиски индекс, особено во поголеми количества, има потенцијал да направи сериозни проблеми со контролирањето на шеќерот, особено преку нарушување на функцијата и чувствителноста на инсулинот.
Како влијае гликемискиот индекс врз лачењето и функцијата на инсулинот?
Гликемискиот индекс (ГИ) на храната игра клучна улога во долгорочното управување со инсулинот и значително влијае на метаболичкото здравје. Храната со висок ГИ брзо се вари и шеќерите брзо се апсорбираат и транспортираат во крвта и клетките. Спротивно на тоа, храната со низок ГИ се вари и се апсорбира побавно, што резултира со постепено зголемување на глукозата во крвта и поблага реакција на лачење на инсулин.
Со текот на времето, исхраната базирана на храна со висок ГИ може да придонесе за зголемена побарувачка на инсулин и може да доведе до инсулинска резистенција, состојба кога клетките на телото стануваат помалку „чувствителни“ на инсулинот. Оваа состојба може да ескалира и до хиперинсулинемија и на крајот, до дијабетес тип 2.
Спротивно на тоа, консумирањето на храна со низок ГИ помага во одржување на стабилни нивоа на глукоза во крвта и го намалува оптоварувањето на бета клетките на панкреасот, овозможувајќи подобра долгорочна функција и чувстиветелност на инсулинот. Дополнително, исхраната и намирниците со низок ГИ се асоцираат и со подобри вредности на триглицериди и холестерол, намален степен на инфламација и помал ризик од кардиоваскуларни заболувања.
Поради ова, препораките јасно укажуваат на бројни бенефити од следење на исхрана со помалку рафинирана и повеќе свежа храна, која природно ќе има и помал гликемиски индекс, но е и извор на низа други корисни нутриенти и соединенија.
[Поврзано: Важни причини зошто треба трајно да ја замениме рафинираната храна (БРАШНА) со ПОЛНОЗРНАСТА храна]
