Во ваквите навистина топли денови, потребни ни се рецепти кои се пред сè лесни за јадење, но и за подготовка. Бидејќи готвењето во рерна многу од нас го избегнуваат поради жештината, денес ќе ви предложиме два рецепти за подготовка на вкусни и здрави оброци каде главната состојка е гравот. Оваа чудесна мешунка се среќава во многу наши јадења, а нејзиниот богат нутритивен состав и пријатен и благ вкус се токму карактеристиките што го прават гравот толку популарен.
Грав – незаменлнивата мешунка
Гравот претставува намирница која е одличен извор на протеини, растителни влакна, комплексни јаглехидрати, минерали и витамини. Имено, во една чаша или во околу 170g грав има:
– 242 калории
– 17g протеини
– 44g јаглехидрати
– 0,6g масти
– 11g растителни влакна
– 55% од Дневно Препорачаниот Внес за бакар
– 36% од ДПВ за витамин В9
– 36% од ДПВ за железо
– 21% од ДПВ за калиум
Воочливо е дека гравот не содржи скоро воопшто масти, а содржи одлично количество на влакна, протеини и микронутриенти. Доколку сакате да прочитате повеќе околу импресивниот нутритивен профил на гравот, кликнете тука.
Грав со домати
За подготовка на овој рецепт потребни ќе ви бидат околу 25 минути, а истиот е доволен за околу 4 порции.
Потребни состојки:
- Маслиново масло
- 1-2 главици кромид, ситно исецкани
- 3-4 чешниња лук, ситно исецкани
- Малку сладок буковец
- 2 конзерви грав (може и претходно сварен домашен грав)
- 2-3 големи свежи домати, ситно исецкани – речиси пасирани
- Малку сол и бибер
- 150g спанаќ
Начин на подготовка:
1 . Во големо тавче, загрејте го маслиново масло. Додадете го кромидот и динстајте го околу 3-5 минути.
2 . Потоа додадете го лукот и буковецот и динстајте уште дополнителни 1-2 минути.
3 . Додадете ги доматите и гравот. Посолете и додадете малку бибер. Ваквата смеса динстајте ја околу 15-20 минути, односно додека дел од водата од доматите не испари.
4 . При крајот, неколку минути пред крајот, додадете го спанаќот и мешајте се додека истиот не омекне и потемни.
5 . Послужете со парче интегрален леб и парче сирење.
Медитеранска салата со грав
За подготовка на оваа салата ви се потребни околу 15 минути, а истата дава околу 6 порции.
Потребни состојки:
- 2 конзерви претходно подготвен грав (може и домашно сварен грав)
- 1 краставица, исецкана
- 1 зелена пиперка, ситно исецкана
- 1 главица кроид, ситно исецкана
- Малку свеж магдонос
- 150g фета сирење
- Сол и бибер
За сосот:
- Малку маслиново масло
- Неколку лажички јаболков или балсамико оцет
- Малку свеж сок од лимон
- Малку буковец и црн бибер како зачин
Начин на подготовка:
1 . Во голем сад ставете ги сите состојки заедно.
2 . Во мал сад ставете ги сите состојки за сосот и фино промешајте ги. Додадете го ваквиот сос кон салатата.
3 . Послужете со парче интегрален леб.
