Времето е топло, па потребата за јадење неретко е во втор план. Сепак, сите сме свесни дека храната мора постојано да се внесува. Така, во летниот период се ориентираме кон т.н. полесни и поедноставни оброци.
Како и да е, најчесто ни фалат идеи за вакви едноставни рецепти, кои не бараат премногу време, но и кулинарски вештини.
Уникатниот зеленчуков сос во продолжение е особено хранлив и вкусен, но и едноставен и брз за подготовка (околу 30 минути).
Дополнително, тој може да се комбинира со навистина бројни едноставни, здрави ручеци, но и вечери богати со сложени јаглехидрати (тестенини, ориз, мешунки, полнозрнести лебови итн).
[Поврзано: 5 распространети невистини за јаглехидратната храна!]
Важно е да се каже дека овој период кога пазарите се полни со свежи плодови, овошки и зеленчуци во различни бои, треба максимално да се искористи. Но, исто така е важно зеленчукот да се јаде и во неговата приготвена форма. Зошто, прочитајте во една од нашите претходни статии, под наслов: Фитична киселина – што треба да знаете за еден од најпознатите антинутриенти?
[Поврзано: Храна која најчесто се јаде погрешно]
Многу повеќе околу здравствените придобивки од сите подолу споменати намирници, прочитајте на нашиот веб сајт.
За овој рецепт потребни ќе ви бидат:
- 3-4 поголеми бабури (жолти, црвени,зелени), исечкани нешто покрупно
- 2 главички свеж црвен кромид, исечкан на прстенчиња
- 3 моркови со средна големина, исечкани на кругчиња
- 250g шампињони, ситно исечкани
- 2-3 чешниња лук, ситно исечкани
- 4 домати со средна големина, исечкани на половинки
- 2 лажички кафен шеќер
- 3 мали лажички ладно цедено маслиново масло
- Малку сол и бибер
Начин на подготовка:
- На загреана рерна поставете нешто подлабока тава со малку ладно цедено маслиново масло. Кога маслото доволно ќе се загрее, најпрво додајте ги соодветно исечканите бабури и гответе 7-8 минути, со често мешање.
- Додајте ги морковите и прстенчињата кромид, па гответе уште 5 минути.
- Додајте ги печурките и лукот, а по неколку минути посолете и додајте бибер по желба. (може и зачини по ваш вкус).На крајот, додајте ги и доматите, превртени со рамната половина кон садот. Додајте 250ml вода, а потоа затворете го капакот и гответе на средно висока температура уште 10-тина минути, со постепено мешање (без да ги поместувате доматите).
- Внимателно извадете ги доматите на страна, па извадете им ја обвивката. Во меѓувреме, привремено тргнете го и садот од оган. Откако ќе ја извадите лушпата на секој од доматите, исечкајте ги сосема ситно, додајте им 2 лажички кафен шеќер пред повторно да ги вратите во садот во којшто претходно се готвеле.
- Гответе дополнителни 7-8 минути и потоа сервирајте со: интегрална паста, интегрален ориз, фиброгел леб и урда/кисело млеко или пак со претходно сварен крупен грав.
- Овој рецепт, прави сос за 4 порции.
[Поврзано: Како да направите ФИБРОГЕЛ ЛЕБ!]
Нутритивна вредност:
(на една порција сo интегрални шпагети)
Калории: 480 Јаглехидрати: 93g од кои растителни влакна: 12g и шеќери: 16g; Протеини: 17g; Масти: 7g од кои заситени масти: 1g и омега-3: 0,1g; Витамин A: 3800IU; Витамин Б2: 0,3mg; Витамин Б5: 1,9 mg; Витамин Б6: 0,5mg; Витамин Б9: 100µg; Витамин Ц: 140mg (пред термичкиот третман); Витамин Е: 3mg; Бакар: 0,4mg; Фосфор: 400mg; Железо: 5mg; Магнезиум: 125mg; Манган: 0,4mg; Цинк: 3,1mg; Калиум: 800mg