Од летото не остануваат уште многу денови, па тоа значи дека треба максимално да го искористиме овој период додека пазарите се’ уште изобилуваат со свежи и здрави зеленчуци и овошки. Помеѓу нив, можеби и најзастапен и најпопуларен во нашата исхрана е доматот. Доматите се идеални за топлитe денови, бидејќи се богати со вода, содржат многу малку калори, а се богати и со витамини и минерали.
Одличен за во салати, но и во готвени јадења
Покрај останатите витамини, доматите особено го содржат витаминот Ц. Се смета дека со консумирање на еден просечно голем домат внесуваме околу 28% од дневните потреби за овој витамин. Тие исто така се богати со растителни влакна, го содржат минералот калиум, а се добар извор и на разни антиоксидантивни компоненти. Меѓу нив може да ги издвоиме ликопенот и бета каротенот.
Ликопенот е црвениот пигмент со силни антиоксидативни својства. Тој е најприсутен во лушпата од доматот и интересно е што неговите својства и количества се подобруваат по одредена термичка обработка на доматите. За разлика од ликопенот, познато е дека витаминот Ц се уништува на повисока температура. Повеќе околу доматите и здравствените придобивки кои ни ги нудат, прочитајте тука.
Вкусни рецепти од домат за ручек или вечера
Во една од претходните статии ви предложивме подготовка на 2 рецепти во кои се користи доматот како главна состојка. Едниот рецепт е супа од домати и црвени пиперки, а другиот рижото со домати. Нив можете да ги погледнете на следниот линк: 2 рецепти со МАКЕДОНСКИ ДОМАТИ!
Во продолжение, одличен рецепт кој може да служи како главно јадење за ручек или за вечера – Полнети домати со леќа и булгур!
За овој рецепт, потребни ќе ви бидат:
- 6 домати со средна големина
- 6 лажици булгур (можете да користите и интегрален ориз), претходно сварен
- 6 лажици зелена или црвена леќа, претходно сварена
- Фета сирење за зачинување, дробено (околу 60g)
- 2 лажици таан
- 1 лажичка копар (по можност свеж)
- 1 лажичка оригано и зелени зачини по желба
- Сол, бибер и малку ладно цедено маслиново масло
Начин на подготовка:
- Со помало ноже најпрво исечете го врвот на доматот, а потоа внимателно извадете ја внатрешноста која ќе ја ставите во еден подлабок сад.
- Во подлабокиот сад потоа додајте ги фета сирењето кое претходно ситно ќе го издробите, сварениот булгур, леќата и зачините. На крајот додајте и од таанот Наросете малку ладно цедено масло, посолете и додајте малку бибер, па добро промешајте.
- Со мала лажичка многу внимателно наполнете ги доматите со претходно подготвената смеса. Наросете уште малку сирење или пармезан и печете 40 минути на температура од 170 – 180 степени или додека доматите не почнат да добиваат ..златеникавa нијанса”.
- Овој рецепт прави две порции.
Нутритивна вредност:
(на една порција што може да служи како цел оброк)
500 калории; 43g јаглехидрати, од кои 13g растителни влакна и 12g шеќери; 21g масти; 23g протеини; 54mg; Витамин Ц; 3mg; Витамин Е; 40mcg; Витамин К; Фолна киселина: Витамин Б6: 0,7mg; Витамин Б1: 0,7mg; Фосфор: 260mcg; Maнган: 2mg; Железо: 5,6mg; Калиум: 1310mg; Цинк: 4mg; Бакар: 0,8mg; Калциум: 270mg; Селен: 11mcg