fbpx

Што е разликата меѓу слабеењето и намалување на масните наслаги? Кое од нив треба да ни е приоритет?

tonus

Голем дел од популацијата има проблем со вишокот килограми и всушност ваквата состојба се смета за една од најчестите на денешницата. Храната е лесно достапна и високо калорична, па затоа може лесно да дојде до прекумерен внес на калории, а со тоа и акумулација на таквата енергија во масно ткиво. Голем процент од луѓето со вишок килограми, во даден момент се обидуваат да ги намалат и тоа претставува еден многу важен и клучен чекор кон подобро здравје.

Но, понекогаш при слабеењето, бројот на килограмите и изгледот на нашето тело може да не соодвестуваат. При слабеењето, доаѓа до повеќе разчилни промени во телото, но не секогаш слабеење значи и исклучиво губење на масните наслаги. Затоа, во денешната статија ќе ја разграничиме и објасниме разликата меѓу намалените килограми и намалените масни наслаги.

 

"“Online”/

Кои се основите на слабеењето?

 

Нашето секојдневно функционирање и опстојување претставува еден баланс на енергија. Внесуваме енергија преку храната (како калории), а истата ја трошиме за извршување на сите метаболиски процеси во организмот, но и за дневните обврски.

Основата на слабеењето е прилично едноставна – нарушување на тој енергетски баланс и трошење на повеќе калории отколку што се внесени. За полесно и поинтензивно трошење на калориите се препорачува физичката активност, а за полесна контрола на внесените калории се препорачува избегнување на високо процесирана, калорична, масна и храна богата со шеќери. Иако навидум овој концепт делува едноставно, најчесто проблемите се јавуваат кога секојдневните обврски влегуваат во равенката.

Најважно при слабеењето е да се изнајде начин кој ќе помогне и ќе го направи целиот процес одржлив и реален. Премногу строги режими на исхрана и вежбање се секогаш тешко одржливи и резултатите од истите се краткотрајни.

Слабеењето е важно бидејќи доведува до значајни промени во здравјето и истото може да влијае исклучително позитивно и на менталното здравје. Меѓутоа, особено важно е при слабеењето да дојде и до намалување на масните наслаги, кои во претходни статии ги имаме дискутирано како потенцијално штетни за нашето здравје.

Бидејќи мерењето на килограмите не покажува дали дошло до значително намалување во масните килограми или општо на тежината, во продолжение зборуваме за разликите помеѓу губењето на килограми и губење на вишок масни наслаги.

 

Што значи губење на килограми, а што губење на масни наслаги?

 

Уште на самиот почеток, треба да напоменеме дека и двата поима подразбираат намалување на телесна тежина.

Слабеењето подразбира губење на килограми преку губење на мускулна маса, акумулирана вода и масно ткиво.

Губење на масното ткиво, како што кажува и името, подразбира намалување на телесната тежина исклучиво преку намалување на масните наслаги и претставува поздрава и поспецифична мерка за процесот на слабеење.

Меѓутоа, понекогаш е тешко да се разграничи поради што точно и што најмногу допринело кон намалените килограми. Како што веќе споменавме, мерењето на килограмите на вага, не е секогаш најпрецизен и објективен индикатор за тоа дали сме ослабеле или едноставно сме се ослободиле од вишокот течности или сл. Исто така, намалените килограми може да дојдат и од изгубено мускулно ткиво.

 

Фокусот треба да е на масните наслаги

 

Голем број т.н „диети“ се фокусираат исклучиво на бројот на килограмите. Но, бројот на килограми често зависи од многу различни фактори, па тој не е секогаш правилен индикатор за слабеењето. Особено непожелно и несакано кај слабеењето е големото и значајно губење на мускулно ткиво.

Имајќи поголем процент на мускулно ткиво, допринесува телото полесно да ги регулира: нивото на шеќер во крвта, нивото на триглицериди и холестерол и полесно се справува со инфламационите процеси.

Бројни студии покажуваат дека поголем сооднос на масно ткиво према мускулно ткиво, доведува до хронични заболувања, срцеви проблеми, дијабет и др. Исто така, поголем процент на мускулно ткиво значи и поголем број потрошени калории во мирување. Мускулното ткиво го подобрува т.н базален метаболизам – односно бројот на калории кои се трошат при мирување за извршување на неопходните животни процеси.

Масните наслаги, особено т.н „длабоки масни наслаги“ може да предизвикаат бројни здравствени проблеми. Особено проблематично е масното ткиво кое се јавува околу стомакот. Тоа е наречено висцерално и се таложи и акумулира подлабоко и во просторот околу стомакот и околните внатрешни органи.

Овој тип на масно ткиво може да создаде штетни соединенија, првенствено цитокини кои ги зголемуваат шансите за срцеви заболувања, но може и да ја намалат чувствителноста на телото кон инсулинот. На тој начин се зголемува и ризикот од појава на дијабет.

Интересно е што луѓето може да немаат значително или драстично покачена телесна тежина, но сепак да имаат голема акумулација на ваквото масно ткиво. Доколку дојде до големо таложење, ризикот се зголемува за:

 

–       Кардиоваскуларни заболувања

–       Инсулинска резистентност и појава на тип 2 дијабет

–       Колоректален карцином

–       Спиечка апнеа

–       Покачен крвен притисок

 

Најчесто до појава на овој тип масно ткиво доаѓа поради прекумерен внес на калории, брз притоа практикување на било каква физичка активност или движење.

При слабеењето, доста лесно се воочува губењето на овој слој масни наслаги. Доколку сакаме да сме сигурни, најдобар индикатор е и мерење на обемот во овој предел. Губење на сантиметри од обемот е доста значаен и добар чекор во слабеењето, но и кон подобрено здравје и физичка подготвеност.

 

Како да го намалиме масното ткиво а да го задржиме и зголемиме мускулното?

 

Како што споменавме, најуспешно слабеење, особено во поглед на масните наслаги, се постигнува со: здрава и избалансирана исхрана (која ќе вклучи калориски дефицит), соодветен внес на протеини и редовно вежбање.

 

  • Калориски дефицит преку здрава исхрана – недостаток на калории не значи и изгладнување и внесување на само одреден тип на намирници, а исклучување на цели останати групи на храна. Постојат голем број на намирници кои може да ве заситат, а притоа не даваат голем број на калории. Зеленчуци, овошје, мешунки, полнозрнести житарки се само дел од намирниците кои можат да ви помогнат при слабеењето. Воглавно, храна која е богата со протеини, растителни влакна, а содржи и умерени количества комплексни јаглехидрати и здрави масти се смета за здрава и идеална при слабеењето.

 

  • Редовно вежбање и физичка активност – вежбањето е исклучително корисна алатка при слабеењето бидејќи го зголемува бројот на потрошени калории. Исто така, тоа помага при градење и одржување на мускулното ткиво, кое пак го забрзува метаболизмот и помага при трошење на уште повеќе калории. Покрај тоа, физичката активност има и сериозни бенефити во поглед на кардиоваскуларното здравје, здравјето на коските, нашето расположение, помага кај лицата со дијабет и др.

 

  • Внес на протеини – протеините се макронутриенти за кои телото троши најмногу калории при нивната дигестија. Се смета дека околу 20-30% од калориите на протеините се трошат за нивна дигестија. Тоа значи дека дигестијата на 50g протеин, наместо да нè обезбеди со целосните 200 калории (4 калории по грам), ќе ни даде околу 140-160 калории. Исто така, протеините помагаат да се чувствуваме заситено, а се особено важни и неопходни во одржување и градење на мускулното ткиво. Потребното количество на протеин кој треба да го внесеме зависи од повеќе фактори: возраст, пол, тежина, ниво на физичка активност и сл. Општите препораки се да се внесува најмалку 0,8-1g протеин на килограм телесна тежина. Овие бројки може да се и драстично повисоки доколку е застапена поинтензивна и честа физичка активност.

Д-р Митов

Д-р Митов

Ние ви помагаме ВИШОКОТ КИЛОГРАМИ и поврзаните БОЛЕСТИ, на ПРИРОДЕН начин и трајно да ги отфрлите, за да бидете: ПОЗДРАВИ, ПОЛЕСНИ и ПОЛЕТНИ!

Leave a Replay

X
Добијте бесплатен пристап до нашиот неделен информатор