Честопати луѓето што практикуваат исхрана базирана на растителна храна се загрижени во однос на тоа дали внесуваат доволно протеини. Заради овие причини, во продолжение даваме 2 предлог-рецепти – веганска храна, богата со протеини.
Многу повеќе на темата дали растителните протеини се доволни, прочитајте на следниот линк: Растителни протеини – Дали се доволни, колку и кои се најдобрите извори?
Индиска леќа со просо
За овој рецепт, потребни ќе ви бидат:
- 200g зелена леќа, исчистена и претходно покисната во вода
- 100g просо
- 1 среден морков, изрендан или исецкан на ситни коцки
- 1 среден кромид, ситно исецкан
- 1 ловоров лист
- ½ кафена лажичка куркума во прав
- 1 кафена лажичка кари во прав
- ½ кафена лажичка чили во прав или црвен пипер
- ½ кафена лажичка лук во прав (може да користите и 1 чешне свеж лук, ситно исецкано)
- ½ кафена лажичка бибер
- ½ шоља кокосово млеко
- вода – колку што е потребно за да дојдете до посакуваната густина
- 3 лажици нутритивен квасец (по желба)
- ½ кафена лажичка морска сол (зачините се доволни, но може да посолите доколку сакате посолено јадење)
- 4 кришки потпечен интегрален леб
Начин на подготовка:
- Започнете со покиснување на леќата најмалку неколку часови. Потоа исцедете ја и добро исплакнете ја.
- Откако ќе завршите со леќата, исплакнете го просото многу темелно.
- Во средно тенџере на силен оган, додадете 1 супена лажица вода. Кога водата ќе почне да прска, додадете го сечканиот кромид и гответе со постојано мешање околу 3 минути, додавајќи вода колку што е потребно за да спречите лепење (по една лажица).
- Во тенџерето додадете го ситно сецканиот морков, ловоровиот лист, заедно со леќата и просото. Мешајте 2-3 минути, а потоа додадете топла вода малку над нивото на состојките и варете додека леќата не омекне, 25-30 минути (може и нешто повеќе). Проверете го нивото на водата за време на крчкањето и додадете повеќе ако е потребно. Додадете го и ловоровиот лист.
- Кога ќе се свари леќата, додадете ги лукот во прав, кокосовото млеко, куркумата, биберот, црвениот пипер и карито и добро промешајте.
- Конечно, додадете го нутритивниот квасец доколку сакате и потоа тргнете го далот од оган.
- Оставете да се излади пред да послужите.
- Овој рецепт прави 3 порции.
- Во овој рецепт, подобро е да ја натопите леќата, бидејќи тоа ќе го намали времето за готвење, ќе ја подобри апсорпцијата на витамини и минерали и ќе го олесни нејзиното варење.
Нутритивна вредност на 1 порција:
Калории | Јаглехидрати [g] | Протеини [g] | Масти [g] |
540 | 94g (15g фибер) | 30g | 5g |
Овој оброк е особено богат со следните микронутриенти: витамини од Б групата (Б1, Б3, Б6, Б9), витамин K, витамин А, витамин Ц, потоа бакар, железо, манган, магнезиум, фосфор, калиум, селен, цинк
Полнети ,,протеински” бабури
За овој рецепт потребни ќе ви бидат:
- 70g киноа
- 1 коцка за супа од зеленчук растворена во вода
- 2 средни бабури
- 2 лажички ладно цедено маслиново масло
- 2 чешниња лук, ситно сецкани
- 1 мал кромид, ситно исецкан
- 100g пченка од конзерва
- 100g црн или црвен грав
- ½ лажичка сол
- ½ лажичка бибер
- друг зачин по желба
- домат (по желба)
Начин на подготовка:
1. Добро измијте го киноа семето и ставете го да се вари во растворената коцка. Кога ќе почне да врие, намалете го огнот и покријте со капакот 12-15 минути за семето соодветно да омекне.
- 2. Загрејте ја рерната на 190°С и премачкајте ја тавата со маслиново масло.
- 3. Во меѓувреме, исчистете ги бабурите така што ќе им ги извадите дршката и семките и премачкајте ги со малку маслиново масло и однадвор и одвнатре.
- 4. Во едно големо тавче ставете 2 лажички маслиново масло, загрејте на рингла и запржете ги кромидот и лукот сосема кратко. Потоа, додадете ги пченката и гравот и гответе ги 10-12 минути за тие да омекнат. Тргнете го тавчето од оган и во него додадете ја киноата. Добро промешајте.
- 5. Наредете ги бабурите во тавата и, користејќи мала лажичка, наполнете ги со смесата од киноа и зеленчук. Можете да им направите и едно „капаче“ користејќи го доматот. Печете ги 15-18 минути.– Овој рецепт прави 1 – 2 порции.
Нутритивна вредност на 1 порција:
Калории | Јаглехидрати [g] | Протеини [g] | Масти [g] |
620 | 100g (19g фибер) | 24g | 16g |
Овој оброк е особено богат со следните микронутриенти: витамин А, витамини од Б групата (Б1, Б2, Б5, Б6, Б9, Б12) и витамин Е, потоа бакар, железо, манган, фосфор, калиуuм, магнезиум, цинк