fbpx

ПОЛНОЗРНЕСТИ ЖИТАРКИ – храна која нуди континуиран и стабилен извор на ЕНЕРГИЈА!

tonus

Добро ни е познато дека јаглехидратите се макронутриент кој претставува примарен извор на енергија за нашиот организам. Понекогаш се случува да  почувствуваме замор и недостиг на енергија, па често велиме дека ни е потребно нешто благо. Причината лежи во самиот начин на кој телото ги искористува шеќерите, па така некогаш може да се јават “пикови” после оброк, а некогаш па се јавува ниско ниво на шеќер во крвта, иако сме јаделе. Токму поради тоа, денес ќе зборуваме малку повеќе за полнозрнестите житарки и начинот на кој тие нè одржуваат сити и го спречуваат тоа нагло “опаѓање” на шеќерот во крвта.

Зошто се важни полнозрнестите житарки?

Полнозрнестите житарки и брашната кои се добиваат од нив се застапени во сите здравствени препораки. Тие треба да бидат темел на нашата исхрана, да се консумираат редовно и трајно да ги заменат рафинираните брашна и производите кои се добиваат од нив. Под зборот полнозрнести подразбираме дека житарката ги содржи сите нејзини составни делови и воопшто не е подложена на деструктивниот процес на рафинација. На овој начин целосно се задржува нејзината нутритивност и се добива продукт (брашно) кој е особено корисен и здрав. Освен како брашна, полнозрнестите житарки може необработени да се користат и во нашата секојдневна исхрана. Овесот, просото, хељдата, пченицата, ‘ржот – може редовно да се користат за подготовка на разни рецепти, а покрај тоа тие се одлична идеја за подготовка на брз и нутритивен појадок.

Токму составот на полнозрнестите житарки (првенствено нивната богата содржина со растителни влакна) ги прави особено погодни и корисни и за лицата со дијабет и покачена телесна тежина.

"“Online”/

На кој начин полнозрнестите житарки делуваат врз гликемискиот индекс на храната?

Полнозрнестите житарки, за разлика од рафинираните, се извор на комплексни јаглехидрати. Во ваква форма, јаглехидратите подлежат на побавна и поконтинуирана дигестија и на тој начин се избегнуваат и спречуваат оние нагли покачувања или т.н „пикови“ на покачување на шеќерот во крвта. Исто така, високата содржина на растителни влакна во полнозрнестите житарки има дополнителен бенефит во овој поглед. Имено, растителните влакна се тип на јаглехидрати кои не подлежат на целосна разградба во нашето тело. На тој начин, тие ја успоруваат апсорбцијата на глукоза во крвта и всушност го намалуваат гликемискиот индекс на храната, односно оброкот.

Значи, колку помал е степенот на рафинација кај житарките и колку повеќе влакна содржат – толку ќе делуваат подобро врз шеќерот во крвта. Во тој поглед, можеме да издвоиме неколку житарки со најдобар состав – хељда, овес, ‘рж, киноа, јачмен и др. Ова се сите житарки кои се извор на комплексни јаглехидрати, растителни влакна, минерали и витамини, а дел од нив имаат и одлични количества на протеини.

Истите може да се користат како главна состојка во рецептите за појадок, па дури и вечера, а може да се користат и како прилог (особено просото, киноата, хељдата) во голем број рецепти за ручек или салата.

Полнозрнестите житарки – храна која заситува и нуди континуиран извор на енергија

Како што споменавме, полнозрнестите житарки имаат прилично низок гликемиски индекс и се погодни за лицата со дијабет. Но, тие се и одличен извор на енергија, па затоа неретко се среќаваат во рецептите за појадоци и ужинки. Тоа се должи воглавно на формата на јаглехидратите кои тие ги содржат. Не сите јаглехидрати се исти, па затоа нивната градба значително ќе влијае и врз начинот на кој тие ќе бидат дигестирани и метаболизирани во нашето тело. Житарките првенствено содржат комплексни јаглехидрати (скроб) кои во телото се искористуваат постепено, континуирано и бавно. Поради тоа, оброците кои ги содржат, нудат подолг и континуиран извор на глукоза и енергија во споредба со храна која содржи прости, рафинирани шеќери. Дополнително, растителните влакна кои се среќаваат во значителни количини во житарките, даваат чувство на заситеност по оброкот, а исто така тие ја контролираат и намалуваат апсорбцијата на глукоза во крвта. Ситоста која ја нудат житарките е особено нагласена кога тие се комбинираат со некаков извор на протеини (пример млеко, растително млеко, јогурт, путер од кикирики и сл.), кој пак може да биде и од самата житарка. Протеините и растителните влакна се добро проучена и позната комбинација која допринесува за ситост и може навистина да ни овозможи да имаме доволно енергија до наредниот оброк. Дополнително, ваквиот континуиран доток на енергија значи и полесна и подобра регулација на телесната тежина. Некои житарки содржат повеќе протеини од другите, а на оваа тема можете да прочитате повеќе тука.

Инаку, полнозрнестите житарки се и одличен извор на разни минерали и витамини кои дополнително делуваат позитивно врз нашето целокупно здравје, а со самото тоа и врз нашето ниво на енергија.

Д-р Митов

Д-р Митов

Ние ви помагаме ВИШОКОТ КИЛОГРАМИ и поврзаните БОЛЕСТИ, на ПРИРОДЕН начин и трајно да ги отфрлите, за да бидете: ПОЗДРАВИ, ПОЛЕСНИ и ПОЛЕТНИ!

Leave a Replay

X
Добијте бесплатен пристап до нашиот неделен информатор