fbpx

Дали се сите РАСТИТЕЛНИ ВЛАКНА исти?- Зошто е важно редовно да се јадат полнозрнестите ЖИТАРКИ?

tonus

Растителните влакна се нешто за што често зборуваме на нашиот блог, а тоа го правиме со причина. Тие не се сметаат за класичен „нутриент“, па поради тоа делуваат и за помалку важни. Многу повеќе се зборува за протеините, мастите и јаглехидратите, а ретко слушаме зошто е неопходно да ги внесуваме и растителните влакна. Поради тоа, преку повеќе различни статии се обидуваме да ја доловиме суштината на овој нутриент, да ја објасниме неговата функција и да ја истакнеме храната каде тој најмногу се содржи. Во тој поглед, една категорија на намирници често се издвојува – полнозрнестите житарки. Тие се исто така често опфатени на нашиот блог, а денес ќе зборуваме малку повеќе за нивната улога во снабдувањето на популацијата со доволно растителни влакна.

Зошто е неопходно почесто да јадеме полнозрнести житарки?

Полнозрнестите житарки и брашната кои се добиваат од нив се застапени во сите здравствени препораки. Тие треба да бидат темел на нашата исхрана, да се консумираат редовно и трајно да ги заменат рафинираните брашна и производите кои се добиваат од нив. Под зборот полнозрнести – подразбираме дека житарката ги содржи сите нејзини составни делови и воопшто не е подложена на деструктивниот процес на рафинација. На овој начин целосно се задржува нејзината нутритивност и се добива продукт (брашно) кој е особено корисен и здрав. Освен како брашна, полнозрнестите житарки може необработени да се користат и во нашата секојдневна исхрана. Овесот, просото, хељдата, пченицата, ‘ржот – може редовно да се користат за подготовка на разни рецепти, а покрај тоа тие се одлична идеја за подготовка на брз и нутритивен појадок.

Сите полнозрснасти житарки (зрна) се составени од 3 дела: лушпа, никулец и ендосперм. Секоја од овие компоненти е извор на различни нутриенти.

"“Online”/

Лушпата е особено богата со растителни влакна, Б витамини, различни минерали (железо, бакар, цинк, магнезиум), но и различни други фитонуриенти, помеѓу кои и разни антиоксиданти.

Никулецот е богат со здрави масти, витамини од Б групата, витамин Е и низа други фитонутриенти. Од друга страна, внатрешниот дел на зрното или ендоспермот е извор на скроб (сложени јаглехидрати), протеини, но во доста помало количество ги содржи микронутриентите со кои се богати другите делови од зрното. Рафинираните брашна го содржат исклучиво овој дел – ендоспермот, па така тие се воглавно извор на скроб, без присуство на микронутриенти и растителни влакна.

Дали се сите растителни влакна исти?

Пред да дадеме одговор на ваквото прашање, најпрвин накратко да објасниме што всушност претставуваат влакната. Растителните влакна или фибер припаѓаат на групата на соединенија наречени јаглехидрати. Познато ни е дека јаглехидратите се есенцијални или неопходни макронутриенти. Сепак, иако припаѓаат во оваа група, растителните влакна се недигестибилни или несварливи за нашиот дигестивен систем, поради отсуството на соодветни ензими. Тие сепак се сметаат за нутриенти кои имаат низа на позитивни влијанија во организмот.

Како што укажува и самото име, растителните влакна се наоѓаат во растителните намирници, односно во делот од нив кој е недигестибилен. Меѓутоа, различни намирници содржат различни форми на растителни влакна. Имено, се работи за големи и сложени молекули, кои навистина може да имаат безброј различни форми и структури. Поради ова, одредени студии ја проучувале разликата измеѓу растителните влакна кои се наоѓаат кај житарките и оние во останатите растителни намирници (овошје, зеленчук, мешунки и сл.)

Се смета дека влакната кои се дел од полнозрнестите житарки нудат посебни, специфични здравствени придобивки и дека истите не можат да се добијат исклучиво преку консумирање само на зеленчук и овошје.

Што утврдила студијата?

Се работи за нова студија, која опфатила над 4.000 испитаници на возраст над 65 години. Посебен фокус бил даден на нивниот внес на растителни влакна, а дополнително биле следени и некои останати параметри како инфламација и состојба на кардиоваскуларното здравје. Периодот на следење бил прилично долг. Првите резултати биле од 1989 година, а последните во 2015. Инфламацијата (воспалението) било мерено преку земање на примероци крв и нивна анализа во поглед на C-реактивниот протеин (CRP).

Резултатите покажале дека растителните влакна внесени преку полнозрнести житарки, довеле до намалување на параметрите за инфламација (CRP), во споредба со групата која влакната ги внесувала главно преку овошје и зеленчук. Дополнително, резултатите покажале позитивна поврзаност меѓу внесот на влакна од полнозрнести житарки и намалениот ризик за кардиоваскуларни заболувања. Ова не е првата студија која го проучувала ефектот на полнозрнестите житарки и формата на растителни влакна кои тие ја содржат.

Една друга студија покажала дека кај пациенти со остеоартритис, оние кои имале најголем внес на влакна од житарки, имале за 14% помал ризик од влошување на болката во зглобовите. Ваквите резултати дополнително одат во прилог за поволниот ефект на житарките во поглед на инфламацијата.

Ова не значи дека останатите намирници кои содржат влакна (зеленчук, овошје, мешунки, јатки и сл.) не се нутритивни, здрави и корисни. Напротив, овие студии само ја нагласуваат важноста од разновидност во исхраната, односно го покажуваат позитивниот здравствен ефект кога внесуваме повеќе различни видови на растителни намирници. Ова особено важи за растителните влакна и нивното позитивно влијание врз здравјето на цревата и цревната микрофлора, кардиоваскуларното здравје, дијабетот, телесната тежина и сл.

Д-р Митов

Д-р Митов

Ние ви помагаме ВИШОКОТ КИЛОГРАМИ и поврзаните БОЛЕСТИ, на ПРИРОДЕН начин и трајно да ги отфрлите, за да бидете: ПОЗДРАВИ, ПОЛЕСНИ и ПОЛЕТНИ!

Leave a Replay

Може ќе ве интересира

Програми

X
Добијте бесплатен пристап до нашиот неделен информатор