Најчесто во топлите летни денови сакаме лесни рецепти за подготвување, но и за јадење. Тешката, масна храна навистина треба да ја избегнуваме и да се ориентираме кон рецепти што содржат повеќе зеленчуци. Затоа, денешните рецепти што ќе ви ги предложиме се меѓу најпознатите и најчесто подготвуваните летни рецепти. Станува збор за рецепт за летна зеленчукова манџа и за добро познатиот пинџур.
Пиперките и доматот – најкарактеристичните зеленчуци за летото
Пиперките дефинитивно се вбројуваат во најзастапените зеленчуци на нашите трпези. Македонија има особено погодни почви за култивирање на високо-квалитетни сорти пиперки, како феферони, бабури, чили, зелени пиперки, ајварки итн.
Овој зеленчук има специфични вкусови карактеристики и навистина широк спекатар на употреби – од свежи салати, полнети пиперки, пинџур, лути пиперки, ајвар и различни зимници, па се до зачини од сушени пиперки.
Пиперките се густо-нутритивна храна, односно имаат висока нутритивна, а ниска калориска вредност. Содржат висок процент на вода (над92%).
Во 100g свежа пиперка се содржат
- само 31kcal
- 6g јаглехидрати (околу 2g растителни влакна)
- 1g протеини
- 3g масти
Пиперките имаат исто така и импресивен микронутритивен состав. Освен што се еден од најбогатите извори на витамин Ц (169% од дневно препорачаниот внес), пиперките се и добар извор на витамин Б6, витамин К, калиум, железо, фолна киселина и провитамин А.
Доматите многу често се присутни на нашите трпези. Тие се идеална храна, особено за топлите периоди кои се пред нас. Богати се со вода, имаат малку калории, а се високо нутритивни.
Доматите содржат огромна количина на вода, околу 95%. Останатите 5% главно отпаѓаат на јаглехидрати и растителни влакна.
Во помал домат од 100g се содржат:
- само 18kcal
- 0,9g протеини
- 3,9g јаглехидрати (1,5g растителни влакна)
- 0,2g масти
Покрај тоа, тие се одличен извор на витамините A, Ц, К, Б6, Б9, како и на минералите калиум, бакар и манган. Исто така, доматите содржат и низа на антиоксиданти, првенствено ликопен, бета каротен и нарингенин.
Летна манџа
Постојат бројни рецепти и варијанти на вкусната летна манџа, но денес ќе ви предложиме еден интересен начин за нејзина подготовка.
Потребни намирници:
- Околу 500g зелени пиперки, исецкани
- 2 главици кромид, ситно исецкани
- 2-3 средно големи домати, исецкани
- 5-6 маслинки, ситно исецкани
- 2-3 чешниња лук, ситно исецкани
- Малку исецкан магдонос и босилок како зачини
- Сол и бибер
- Малку маслиново масло
Начин на подготовка:
- На малку маслиново масло го динстаме исецканиот кромид. По неколку минути, кога истиот ќе омекне и пожолти, ги додаваме пиперките и лукот. Продолжуваме со динстањето уште неколку минути, додека не омекне пиперката.
- Потоа ги додаваме доматите. Динстаме неколку минути и ги додаваме маслинките, магдоносот, босилокот и зачинуваме со сол и бибер. Динстаме додека дел од водата испуштена од доматите не испари и самата манџа се згусне.
- Ваквата манџа може да се сервира со парче интегрален леб и сирење или урда.
Домашен пинџур
Пинџурот е можеби едно од најтрадиционалните и познати јадења на нашата кујна. Типичен е за летниот период и истиот може да се подготви на различни начини и со разни состојки.
За подготовка на нашиот предлог за пинџур, потребни ќе ви бидат:
- 6-7 зелени пиперки
- 2 средно големи домати
- 1 средно голем модар патлиџан
- 2-3 чешниња лук
- Масло по потреба
- Малку магдонос како зачин (или било која тревка по желба)
- Сол и бибер
Начин на подготовка:
- Модрите патлиџани, доматите и пиперките се печат во рерна на 200 степени. Може да ги печете и на електрична скара. По печењето, излупете ги и процедете ги во цедалка.
- Доколку сакате може само со вилушка или нож да ги исечете во оваа фаза, или доколку сакате поразлична конзистенција може и да ги истолчите. На крајот го додавате ситно исецканиот лук, солта, биберот и магдоносот по желба.
- На страна загрејте малку масло и додадете го кон пинџурот.
- Послужете со парче интегрален леб. Ваквиот пинџур е одличен додаток кон секаков ручек и истиот може да се складира во фрижидер повеќе денови.
