Таратор во две варијанти

Искорисете го ваквиот период од годината и освежете ги вашите јадења со свежо подготвен таратор. Тој претставува една лесна и хранлива замена на било која салата, а може да се употреби како прилог на било кој ручек, но и на појадокот и вечерата.

Краставицата е една од намирниците со најмала калориска вредност. Покрај тоа, таа содржи низа на микронутриенти, што ја прави навистина густо-нутритивна. Од 150g краставици, покрај само 22kcal, добиваме и:

• 0,2g маснотии
• 5,5g јаглехидрати
• 1g протеини
• 1g растителни влакна
• 7% од Дневно Препорачаниот Внес за витамин Ц
• 31% од ДПВ за витамин К
• 5% од ДПВ за магнезиум
• 7% од ДПВ за калиум
• 6% од ДПВ за манган

Таа во својот состав содржи дури 96% вода, а тоа ја прави исклучително освежителна и лесна за во топлите денови.

Таратор со кисело млеко

Ваквиот рецепт за таратор е особено нутритивен, а сепак ниско калоричен. Урдата и киселото млеко се добар извор на протеини и минерали и го прават ваквиот таратор исклучително вкусен. Набројаните состојки се доволни за околу 4 лица.

Потребни состојки:

• 2 средно големи краставици, исецкани на коцкички
• Едно канче кравјо кисело млеко (400ml)
• 150g урда
• 4 чешниња лук, ситно исецкани
• Магдонос, босилок, малку мешавина од зачини за тартар сос
• Малку мелен црн бибер
• Неколку капки маслиново масло за декорација

Начин на подготовка:

1. Во голема здела ставете ги исецканите краставици, лук, кисело млеко и урдата. Фино промешајте (урдата треба да е фино распределена низ киселото млеко)
2. Украсете со набројаните зачини и пропрскајте со малку маслиново масло.
3. Послужете како прилог на некој оброк, или како ужина со потпечено парче интегрален леб.

Нутритивна вредност на 1 порција:

Овој оброк ги содржи витамините од Б групата, како и витамините Ц, А и К. Исто така, се содржат минералите : калциум, магнезиум, фосфор, натриум, селен и калиум.

Таратор со павлака и ореви

Ова е слична верзија на претходниот рецепт, но киселото млеко и урдата се заменети со павлака. Оревите се додатен извор на здрави масти (особено на омега-3 масните киселини) и протеини,а даваат интересен, богат вкус на тараторот. Набројаните состојки се за околу 4 порции.

Потребни состојки:

• 2 средно големи краставици, исецкани на коцкички
• 250-300ml павлака (пожелно е со помала масленост)
• 30g ореви, ситно исецкани
• 3-4 чешниња лук, ситно исецкани
• Кари, куркума, оригано и мелен црн бибер како зачини
• Малку маслиново масло и магдонос за декорација

Начин на подготовка:

1. Во голема здела ставете ги исецканите краставици, лук, павлака и оревите. Фино промешајте, додека парчињата орев не се еднакво распределени низ смесата.
2. Украсете со набројаните зачини и пропрскајте со малку маслиново масло.
3. Послужете како прилог на некој оброк, или како ужина со интегрален крекер или двопек.

Нутритивна вредност на 1 порција:

Овој оброк ги содржи витамините од Б групата, како и витамините Ц, А и К. Исто така, се содржат минералите : калциум, магнезиум, фосфор, натриум, селен и калиум.

Оревите исто така  допринесуваат за внес на голем процент од потребните омега-3 масни киселини.