Проблемите со тироидната жлезда се нажалост доста чести и голем дел од популацијата има некоја форма на нарушена функција на тироидата. Хашимотото е едно од најчестите заболувања, особено кај жените. Во продолжение ќе зборуваме зошто всушност ова автоимуно заболување е толку често и зошто се јавува почесто кај жените.
Која е функцијата на тироидната жлезда?
Тироидната или штитна жлезда е мала жлезда во облик на пеперутка, сместена во централниот, преден дел на вратот. Иако многу мала, таа игра екстремно значајни метаболитички улоги преку излачените тироидни хормони кои низ крвотокот се пренесуваат до секоја клетка.
Тироидната жлезда ги лачи хормоните T3 и T4. Овие хормони во крвта се јавуваат во слободен облик, како fT3 и fT4 и се врзани за транспортните протеини, тироксин – врзувачки глобулин, преалбумин и албумин.
Околу 0,3% од вкупниот Т3 циркулира kako fT3 и околу 0,04% како fT4. Овие форми се биолошки активни.
Излачувањето на хормоните од штитната жлезда е под влијание на TSH (тиреостилуматорен хормон) кој го лачи хипофизата.
Всушност, овие хормони го регулираат катаболизмот, односно делот од метаболитичките патишта на создавање енергија од внесената храна. Исто така, овие хормони го помагаат контролирањето на растот на клетките, нивното обновнување и метаболизмот. На тој начин, оваа жлезда е доста значајна во регулирањето на работата на срцето, мозокот и регулирањето на телесната температура.
Значи, ако нивото на тироидните хормони опадне (хипотироидизам), телото на некој начин успорува, односно не е во можност да создаде доволно енергија од која има потреба. Но, чест случај е и претераната продукција на тироидни хормони или хипертироидизам.
Според статистиката, ваквите нарушувања почесто се случуваат кај жените, а во светот некакво нарушување на тироидната жлезда имаат над 200 милиони луѓе.
Зошто е Хашимотото толку често?
Хашимото тироидитис, често автоимуно нарушување на тироидната жлезда, несразмерно ги погодува повеќе жените во споредба со мажите. Оваа родова разлика во преваленцата може да се препише на неколку фактори. Прво, жените генерално имаат поголема предиспозиција за автоимуни болести поради одредени вродени разлики во имунолошката функција и хормоналната регулација. Естрогенот, на пример, игра сложена улога во модулирањето на имунолошките одговори, потенцијално зголемувајќи ја подложноста на автоимуни состојби како Хашимотото. Покрај тоа, флуктуациите на нивото на естроген за време на пубертетот, бременоста и менопаузата може да предизвикаат влошување на функцијата на тироидната жлезда, особено кај жени кои веќе имаат генетски предиспозиции. Дополнително, постојат доста други комплексни генетски механизми и фактори кои ги прават жените поподложни на автоимуни заболувања, но во ваквите механизми нема да навлагаме во оваа статија.
Од друга страна, репродуктивната функција и поврзаните хормонални промени во текот на животот на жената може да придонесат за изменетите имунолошки реакции поврзани со Хашимотото. Промените во нивото на хормони, како и низата на различни промени кои се одвиваат за време на бременоста може да се дополнителен фактор кој ја зголемува зачестеноста на Хашимото. Генерално гледано, интеракцијата меѓу генетската предиспозиција, хормоналните флуктуации, имунолошката регулација и други различни фактори од средината објаснуваат зошто Хашимотото е автоимуно заболување кое почесто го среќаваме кај жените.
[Поврзано: Што претставува Хашимото тироидит и дали ИСХРАНАТА може да влијае?]
