Во оваа статија ќе зборуваме за важноста од редовност, односно континуитет за искористување на придобивките од физичката активност. Многумина од нас, поради разни обврски не се во можност да имаат редовна, континуирана физичка активност, па истата ја оставаат за време на викендите. Денес ќе зборуваме зошто е подобро да се одвои барем половина час од секојдневието, наместо да се остава движењето исклучиво за викендите.
Зошто е важно да сме физички активни?
Редовната физичка активност, покрај здравата исхрана, е можеби една од наједноставните, а сепак најефикасни алатки за одржување на нашето здравје и виталност. Како здрава навика, вежбањето може значително да допринесе кон подобрување на нашето физичко, но и ментално здравје.
Дел од придобивките кои физичката активност ги дава се:
- Одржување на телесната тежина – физичката активност помага да ја одржиме, па и намалиме телесната тежина, бидејќи таа ја зголемува потрошувачката на калории. Било кој тип на активност, во било кој период може да ви помогне да потрошите неколку дополнителни калории.
- Подобрено срцево здравје и намален ризик од заболувања – вежбањето е добар начин да се регулира „лошиот“ LDL холестерол, а да се подобри нивото на т.н „добар“ холестерол. Редовната физичка активност го намалува ризикот за: мозочен удар, срцев удар, хипертензија, тип 2 дијабет и сл.
- Подобар и поквалитетен сон – физичката активност е еден од најдобрите начини за да го подобриме квалитетот на нашето спиење. Повеќе на оваа тема може да прочитате во една од нашите претходни статии, која можете да ја најдете тука.
- Подобрена физичка подготвеност, градење ново мускулно ткиво и поздрави и посилни коски.
- Подобрено расположение – вежбањето и движењето доведуваат до лачење на одредени хормони – ендорфини, адреналин и сл. Тие се сметаат за заслужни за ефектот на подобрување на расположението кој го има физичката активност.
Зошто физичката активност не треба да ја оставиме и планираме само за викендите?
Практикување на некој тип на физичка активност само за време на викендите, наспроти умерено движење како дел од секојдневната рутина, може да не ги обезбеди истите здравствени придобивки. Редовната физичка активност е поврзана со бројни физиолошки адаптации кои придонесуваат за подобрување на кардиоваскуларното здравје, метаболичките функции и целокупната благосостојба. Кога активноста е концентрирана исклучиво за време на викендите, телото доживува спорадичен модел на стрес и закрепнување, што може да значи и несоодветна адаптација и ефект на физичката активност.
Покрај тоа, седечкиот начин на живот во текот на работната неделата може да се „спротистави“ односно да ги поништи позитивните ефекти од вежбањето за време на викендот. Ова доведува до зголемен ризик од хронични болести како што се дебелина, дијабетес и кардиоваскуларни нарушувања.
Редовноста во физичката активност е клучна за одржување на метаболичкото здравје и промовирање на долговечноста. Дневните умерени движења, како што се пешачење, возење велосипед или лесен тренинг со отпор, помагаат во регулирање на нивото на шеќер во крвта, управување со тежината и намалување на воспалението, далеку поефикасно од спорадичните тренинзи за време на викендот. Дополнително, секојдневната физичка активност промовира подобро ментално здравје преку намалување на нивото на стрес и анксиозност. Затоа, иако вежбањето за време на викендот може да биде корисно, идеално треба да ја надополни веќе постоечката редовна рутина на умерено движење во текот на работната недела, за да ги максимизира здравствените придобивки и да ги ублажи ризиците поврзани со веќе постоечкиот седечки начин на живот.
