Добро знаеме дека дијабетот е загрижувачка состојба, која нажалост, сè повеќе е застапена. И покрај алармантната статистика, која вели дека над 400 милиони луѓе ширум светот страдаат од дијабет, факт е дека голем дел од популацијата не ја контролира состојбата соодветно. Најчесто решението се гледа во терапијата, а не се превземаат никакви превентивни чекори во нашите секојдневни, животни навики. Една од главните промени која треба првично да се направи е токму промената во начинот на исхрана. Во тој поглед, денес ќе зборуваме за едно истражување кое се фокусирало на неколку начини за намалување на шеќерот и нивната ефикасност.
Што претставува дијабетот?
Дијабетот претставува состојба кога телото неправилно ја искористува и се справува со глукозата која е присутна во крвта. Ова најчесто е поради недоволно количество или поради не ефективност на хормонот – инсулин. Тој е одговорен за правилно регулирање и искористување на глукозата од крвта. Со негова помош таа успешно навлегува во клетките каде се искористува како извор на енергија.
Постојат повеќе типови на дијабет – тип 1, тип 2, преддијабетна состојба, како и гестационален дијабет. Ризик факторите се бројни, но најчестите се: генетски, прекумерна телесна тежина, возраста, слаба физичка активност, останати здравствени состојби (хипертензија, покачен холестерол, покачени триглицериди), бременост и сл.
Покрај лекарствата кои може да помогнат при третирање на било кој тип на дијабетна состојба, промени во животните навики исто така може да имаат исклучително позитивен ефект. Регулирање на телесната тежина, поредовна физичка активност, добра хигиена на спиење, избегнување и контролирање на стресот и секако здрава исхрана се дел од најчестите препораки за подобро справување, па дури и превенција на дијабетот.
Доколку дијабетот веќе се јавил, посветување внимание на исхраната е еден од првите чекори кои го превземаат луѓето. За намирниците и ужинките кои се пожелни и безбедни за дијабетичарите веќе имаме пишувано во претходни статии и за нив може да прочитате тука, додека намирниците кои треба да се избегнуваат може да ги најдете тука.
Истражување: што е поефикасно за намалување на шеќерот – наизменичното постење или држењето диета?
Во ова истражување биле вклучени над 200 испитаници на просечна возраст од 58 години, а во просек сите имале прекумерна телесна тежина (базирано на нивниот BMI). Испитаниците биле поделени во три групи:
- Првата група следела наизменично постење 3 дена во неделата. Оброците биле меѓу 8 часот наутро и 12 часот на пладне, а потоа следел 20 часовен пост. Во останатите 4 дена од неделата, јадењето било вообичаено, без пост.
- Втората групата следела „диета“ или режим на исхрана со намален број калории. Од вкупниот број на потребни калории, испитаниците добивале 70% преку исхраната, но нивните оброци не биле временски лимитирани.
- Третата група следела општи препораки за слабеење, без конкретна метода или насока
Времетраењето на ваквиот начин на исхрана бил 6 месеци, а испитаниците биле следени 12 месеци потоа. Нивното ниво на шеќер било мерено на вториот, шестиот и дванаесеттиот месец.
Резултати од истражувањето
Резултатите по истекот на дванаесеттиот месец биле навистина интересни – групата која следела наизменично постење 3 дена во неделата, имала за речиси два до три пати поголемо намалување на шеќерот, во споредба со останатите две групи. Дури и по една година, оваа група имала најдобри резултати и најголемо намалување на нивото на шеќер. Првите две групи исто така имале и подобри резултати во поглед на намалување на телесната тежина.
Кај групата кое следела наизменично постење дошло и до минорно зголемување на инсулинската сензитивност и одреден пад во нивото на холестерол.
По една година, околу 78% од испитаниците во втората група продолжиле со ваквиот начин на исхрана, додека 42% од испитаниците во првата група продолжиле со наизменичното постење. Треба да се напомене дека 45% од испитаниците во првите две групи, за време на истражувањето пријавиле некаков несакан ефект – замор, опстипација, главоболка – наспроти 19% од испитаниците во третата група кои пријавиле вакви ефекти.
Заклучок
Ваквите резултати се надоврзуваат на веќе постоечките истражувања и докази за ефикасноста и бенефитите кои следат со наизменичното постење. Постојат навистина голем број варијанти и начини на ваквиот начин на исхрана – најчесто внесот на храна се лимитира во рамка од 4,6 или 8 часа, а потоа следи пост од 20,18 или 16 часа. Друг тип на пост е 5:2. Ваквиот пост е малку поразличен и подразбира лимитирање на внесот на калории (само 25% од потребните калории) 2 дена во неделата. Во останатите 5 дена од неделата, внесот на храна е вообичаен.
Целта на ваквото постење е да го ограничи и регулира периодот кога внесуваме храна, а во преостанатиот период телото да премине во состојба на постење, односно искористување и претворба на резервите во енергија. Ова е една од причините поради која ваквиот пост може да доведе до намалување на телесната тежина и регулација на шеќерот.
Покрај тоа, истражувањата покажуваат дека ваквиот пост може да доведе и до останати здравствени бенефити:
- Подобрен метаболизам
- Намалени воспаленија
- Подобра функција на имуниот систем
- Намалени нивоа на холестерол
- Подобрени когнитивни способности
- Подобро расположение
- Подобар сон
