Во медитеранската кујна, рибата има централно место и се смета за една од најздравите намирници. Без разлика дали е морска или слатководна, таа се употребува често и во комбинација со многу зеленчуци. Препораките се риба да се консумира барем еднаш до два пати неделно. Рибиното месо е одличен извор на комплетни протеини, витамини и здрави, незаситени масти. Исто така, рецептите со риба се најчесто многу лесни за подготовка и не подразбираат подготовка која трае со часови. Затоа, во продолжение ќе ви издвоиме и предложиме два вкусни рецепти за подготовка на риба на медитерански начин.
Рибиното месо е нутритивно, а сепак нема премногу калории
Од повеќето типови на риба присутни на нашите пазари, да ја издвоиме пастрмката како можеби најпознатиот и најчесто користен тип на риба.
Пастрмката е исклучително популарна на нашите простори, а тоа можеме да кажеме дека делумно се должи на нејзиниот умерен, пријатен и неутрален мирис и вкус. Таа се смета за релативно ниско калорично месо, содржи само 119 калории/ 100g.
Од макронутриентите на 100g пастрмката содржи:
- 0g јаглехидрати
- 3,5g вкупни масти, од кои – 0,7g заситени, 1,1g мононезаситени и 1,2g полинезаситени
- 20,5g протеини
Од витамините, ги содржи повеќето витамини од Б групата (Б1, Б2, Б3, Б5, Б6, Б9 и Б12) и витамините А, Д и Е.
Пастрмката содржи и многубројни минерали – фосфор, селен, калиум, магнезиум, манган, калциум, цинк, бакар, железо и натриум.
Ваквиот нутритивен профил, особено во поглед на макронутриентите, ни дава сосема очигледна порака – пастрмката е добар извор на протеини, здрави масти, но и на витамини и минерали.
Доколку немате пастрмка на располагање или преферирате друг тип на риба, слободно заменете ја наместо пастрмката во рецептите кои следат.
Печена пастрмка со лимон, лук и магдонос
Овој рецепт е исклучително едноставен и лесен за подготовка и за него ќе ви бидат потребни околу 30 минути. Истиот е доволен за околу 2 порции.
Потребни намирници:
- Половина килограм пастрмка (две помали парчиња)
- 400g компир, исецкан на коцкички
- Маслиново масло
- 5 чешниња лук, ситно исецкани
- Свеж магдонос, исецкан
- Сол и мелен црн бибер
- Сок од лимон
Начин на подготовка:
- Обложете тавче во кое ќе ја печете рибата со хартија за печење. Ставете ги парчињата риба и пропрскајте со малку маслиново масло.
- Распространете го компирот околу рибата. Внатрешноста на рибата наполнете ја со малку мешавина од лук и магдонос. Зачинете го компирот и рибата со сол и мелен црн бибер.
- Печете околу 15 минути на температура од 190-200℃, односно додека рибата фино не зарумени, а нејзиното месо не омекне.
- При послужувањето, пропрскајте го сокот од лимон врз парчињата риба.
Тава од риба и зеленчуци
За подготовка на овој рецепт потребни ќе ви бидат околу 40 минути и истиот е доволен за 4 порции.
Потребни намирници:
- 1 лимон
- 1 црвена пиперка, исецкана на тенки ленти
- 1 зелена пиперка, исецкана на ленти
- 1-2 домати, исецкани на покрупни парчиња
- 2-3 компири, исецкани на коцки
- 1 кромид, исецкан на тенки кругови
- Маслиново масло
- Околу 1kg пастрмка, поделена на 3-4 парчиња
- Свежо оригано, сол и мелен црн бибер
Начин на подготовка:
- Тавче за печење обложете го со хартија за печење. Поставете ги црвената и зелената пиперка, доматот, кромидот, компирот и фино зачинете ги. Пропрскајте ги и со малку маслиново масло. Печете го зеленчукот на 200℃ , околу 20 минути.
- Во меѓувреме, промијте ја фино пастрмката и вишокот вода впијте ја со хартија. Ставете неколку тенки парченца лимон во внатрешноста од рибата и фино посолете ја и зачинете ја. Премачкајте ја со малку маслиново масло.
- Извадете го тавчето во кое се пече зеленчукот. Ставете ги парчињата риба во тавчето, а зеленчукот размешајте го со цел подеднакво да се испече. Вратете го тавчето во рерна и печете дополнителни 20 минути, односно додека рибиното месо не омекне.
- Послужете со малку лимонов сок и крупна морска сол.
